Ավիաուսումնական կենտրոն ՓԲԸ

Հայաստանի քաղաքացիական ավիացիան հիմնադրվել է 1933 թվականին: 1961 թվականին ստեղծվել է ուսումնավարժական էսկադրիլիան, որը մի շարք անվանափոխումներից հետո, 1993 թ. ստացել է իր ներկայիս անվանումը՝ «Ավիաուսումնական կենտրոն», իսկ 2001 թ. ստացել է ներկա կազմակերպաիրավական ձևը՝ ՓԲԸ:

Ավիաուսումնական կենտրոնը գտնվում է Զվարթնոց օդանավակայանի տարածքի վերահսկելի գոտում:

Ավիաուսումնական կենտրոնն ավարտած ուսանողներից շատերն այսօր աշխատում են ինչպես Հայաստանի, այնպես էլ այլ երկրների քաղաքացիական ավիացիայի տարբեր ծառայություններում:

Ներկայիս Ավիաուսումնական կենտրոնը (ԱՈՒԿ) ստեղծվել է Հայաստանի Հանրապետության կառավարության 1993 թվականի մարտի 9-ի թիվ 89 որոշմամբ և Հայաստանի Հանրապետության քաղաքացիական ավիացիայի գլխավոր վարչության 1993 թվականի մարտի 15-ի թիվ 87 հրամանով:

   Ավիացիոն ուսումնական կենտրոնի գործունեության հիմնական նպատակներն են թռչող անձնակազմերի, օդային երթևեկության կառավարման կարգավարների, ինժիներատեխնիկական աշխատակազմի, ավիացիոն անվտանգության, փոխադրումների ծառայության աշխատակիցների և այլ ավիացիոն մասնագետների նախնական պատրաստումը, վերապատրաստումը և որակավորման բարձրացումը:

Ավիաուսումնական կենտրոնն ամեն տարի լիցենզավորվում է Քաղաքացիական ավիացիայի կոմիտեի կողմից՝ որպես Հաստատված ուսումնական կազմակերպություն (ATO):

Ավիաուսումնական կենտրոնը 2003 թվականից լիցենզավորված է Հայաստանի Հանրապետության կրթության և գիտության նախարարության կողմից: Կենտրոնն իրականացնում է միջազգային ավիացիոն կրթական չափորոշիչներին և պահանջներին համապատասխան ավիացիոն մասնագետների ուսուցում, և միջին մասնագիտական կրթական ծրագրերով պատրաստում է.

-    օդային տրանսպորտի երթևեկության կառավարում՝ կարգավարներ,
-    փոխադրումների  կազմակերպում և կառավարում օդային տրանսպորում՝ տեխնիկ-կարգավար,
-    թռչող ապարատների  և ավիաշարժիչների տեխնիկական շահագործում՝ ավիատեխնիկ,
-    թռչող ապարատների  թռիչքային  շահագործում՝ օդաչու,
-    2025թ-ից   թռչող ապարատների  ավիացիոն և ռադիոէլեկտրոնային սարքերի շահագործում՝ ավիատեխնիկ:

     Ավիատեխնիկների և օդաչուների  ուսման տևողությունը 3 տարի է, իսկ օդային երթևեկության կառավարման կարգավարների և  փոխադրումների կազմակերպում և կառավարում տրանսպորում  բաժինների ուսման տևողությունը՝ 2 տարի 6 ամիս:

Դասընթացներն իրականցվում են անհրաժեշտ գույքով և ժամանակակից տեխնիկայով հագեցված լսարաններում:

Ուսանողներն իրենց ուսումնական և արտադրական պրակտիկաները անցնում են ՀՀ գրանցված ավիաընկերություններում, ինչպես նաև Զվարթնոց օդանավակայանի տարբեր ծառայություններում:

Ուսումնառությունն ավարտվում է պետական քննություններով, ինչի արդյունքների հիման վրա տրվում է պետական նմուշի դիպլոմ:

Դասընթացներն իրականացվում են առկա ուսուցմամբ՝ ավիացիայում մեծ փորձ ունեցող, որակավորված հիմնական և հրավիրված դասախոսների կողմից:

Ավիաուսումնական կենտրոնը միակ հաստատությունն է Հայաստանի Հանրապետությունում, որն իրականացնում է մասնագիտական կրթական ծրագրեր
Ավիաուսումնական կենտրոնում անցակցվում օդաչուների և օդային երթևեկության կառավարման կարգավարների համար ավիացիոն անգլերենի ատեստավորում՝ համաձայն ԻԿԱՕ-ի/միջազգային քաղավիացիոն կազմակերպության/ պահանջների:

Ավիաուսումնական կենտրոնն իրականացնում է բորտուղեկցորդների նախնական պատրաստվածություն և որակավորման բարձրացման դասընթացներ:   

2023թ-ից  անցկացվում են <<Ցամաք-ջուր>>  վթարափրկարարական դասընթացներ վայրէջքի  փուլում ՝ Boeing  և Airbus    օդանավերի համար:

Ուսումնական կենտրոնում կազմակերպվում և իրականացնում  են  տարբեր վերապատրաստման դասընթցներ՝ պատվիրատուների պատվերների հիման վրա: